رسالة نارية من مواطن للسيسي ’’ سيادة الرئيس سيبك من المطبلاتية ..فالمجاعة على الأبواب’’

سجل دخولك حتى تتمكن من تسجيل اعجابك بالخبر

بقلم / حامد أبو الخير

 

السيد الرئيس / عبد الفتاح السيسى

رئيس جمهوريه مصر العربيه
تحيه طيبه و بعد

دى تانى مره بأكتبلك فيها و قولت يمكن مشوفتش او مأختش بالك او محدش قالك على اللى كتابته المره اللى فاتت .....
المهم بقى


قولتلك انزل و اسمع من الناس ماتسمعش للى حواليك والله و الله و الله هايودوك و يودونا فى ستين داهيه مصر بتضيع 
طيب هات ناس بتفهم فى الاقتصاد اعمل مؤتمر اقتصادى داخلى لحل الازمه ادعوا ليه بسرعه و ادعوا فيه خبراء الاقتصاد و البنوك و رجال الاعمال و غرفه الصناعه و التجاره و كمان تجار و مستوردين و المصدرين و رؤساء المناطق الجمركيه بس سيبك من وزراء الماليه و الاقتصاد و محافظ البنك المركزى و الناس اللى بتتصور كل يوم و عمالين يطلعوا احاديث اكتر ما بيشتغلوا


بس خالى بالك يا ريس مؤتمر بجد ( بجد ) مش زى بتاع شرم الشيخ
عين محافظين جدد من خارج المؤسسه العسكريه يكون عندهم افكار و مقترحات للتطوير الاجتماعى و الاقتصادى المحلى حتى يساعد على ايجاد حلول للازمه الاقتصاديه
مش محافظين تفتتح ميادين ولا بيجروا وراء الباعه الجائلين لا ناس بتفكر بجد ..... 
حاول كمان ماتزودش على الغلبان علشان الناس فاضى الكيل بهم ( يا جاى على قوتى يا ناوى على موتى ) معلش بقى هو المثل كده


احنا نقف مع مصر و معاك فى المحنه ماشى و ممكن اكل طقه و طقه لا إنما كمان ابقى مش لاقى حتى قوت يومى الناس معدش قدامها حد غيرك و مش هايسكتوا كتير الحقهم قبل ما تبقى ثوره جياع والله الناس على اخرها
قولهم كمان يبطلوا يستفزوا الناس يعنى ايه يتحصل من الناس دمغه للقضاه هو القاضى ده بيدينى لما بتعب علشان اتعالج


و قولهم كمان يبطلوا موضوع الجبايه ده و يدورا ازى ينعش الاقتصاد و عجز الموازنه بعيدآ عن جيوب الغلابه ماهو برضوا كده كتير اوى يعنى 20% زياده كهرباء و زياده اسعار جميع السلع بلا استثاء علشان الجنيه هو اللى نازل فى الارض مش الدولار هو اللى بيزيد 
آه على فكره لو الناس دى قالتلك اننا بنسيطر على الدولار والكلام ده قولهم إن فيه ناس كتير اوى اوى بيفهموا فى الاقتصاد احسن منكم بيقولوا إن الدولار فى 15/8/2016 سيصل الى 14.50 جنيه و لسه


أقسم بالله و انا بكتب الكلمتين دول الدولار طلع من 12.60 الى 12.80
طيب الضريبه المضافه عارف التجار هاتعمل ايه فى الناس على حس الموضوع ده و ماتقوليش الرقابه و ضبط الاسعار و الكلام ده مش هايحصل حضرتك و انا و مصر كلها عارفه ان مافيش مؤسسه فى مصر نظيفه الاغلبيه فاسدون إلا ما رحم ربى
الحق الناس
( الناس زعلانه وبتصرخ وبتنادي
ياريس وفي بوعودك كده تعبنا
وسيبك م اللي بيهلل وبيهاتي
بلادنا عايزه كام دكتور ومتخصص
يعالجوا الأزمه ويرموا شروخ بيتنا )

خالى بالك الكل هايضحى بيك حتى اقرب الناس اليك و من لم يكن الماضى له واعظ فلا فائده من كل المواعظ


ماتزعلش من كلامى بس هى دى الحقيقه
خالى بالك كمان عارف يعنى ايه و انت لسه فى نصف مدتكم الرئاسيه و بعض المواقع الالكترونيه تعمل إستفتاء عن شعبيتك ؟؟؟؟؟
عارف انك رجل تحب هذا البلد و تعمل من اجله و اجلنا ليل نهار ولكن عديمى الخبره ممن حولك هم السبب فيما نحن فيه الان
اللهم لا تجعلنا نرى فى عهدك ما سمعنا وعرفناه عن الشده المستنصريه
اللهم احفظ مصر من كل من اراد بها و باهلها سوءآ
بسم الله الرحمن الرحيم

" الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُواْ

لَكُمْ فَاخْشَوْهُمْ فَزَادَهُمْ إِيمَاناً وَقَالُواْ حَسْبُنَا اللّهُ

وَنِعْمَ الْوَكِيلُ . فَانقَلَبُواْ بِنِعْمَةٍ مِّنَ اللّهِ وَفَضْلٍ لَّمْ

يَمْسَسْهُمْ سُوءٌ وَاتَّبَعُواْ رِضْوَانَ اللّهِ وَاللّهُ ذُو فَضْلٍ

صدق الله العظيم

معلش طولت عليك شويه بس كلمتين من اخوك الصغير كانوا طبقين على نفسى فقولت اخلص ضميرى قدام ربنا و اقولهم و اجرى على الله

مقدمه لسيادتكم المواطن
حامد ابو الخير

 
 

Ahmed Sherdy Ahmed Sherdy
المدير العام

رئيس مجلس إدارة مصر الآن

0  12653 0

الكلمات الدلالية

آخر المجبين بالخبر

اخبار مشابهة

اخبار مقترحة